काठमाडौं, २० असार । नेपाली कांग्रेसकी नेतृ सुजाता कोइरालाले प्रधानमन्त्री केपी शर्मा ओलीको विकल्प खोजे मुलुक दुर्घटनामा पर्ने चेतावनी दिएकी छिन ।
रिपोर्टर्स क्लब नेपालले आयोजना गरेको साक्षात्कारमा उनले भनिन्,‘तीनवटै निर्वाचन नभएसम्म सरकार ढाल्ने सपना कसैले पनि देख्नु हुँदैन । त्यो आफ्नै लागि घातक हुन्छ ।’
साक्षात्कारमा कोइरालाले अहिले नै प्रधानमन्त्री केपी शर्मा ओलीको विकल्प खोजे मुलुक दुर्घटनामा पर्ने र त्यसको अपजस काग्रेसमाथि आउन सक्ने भन्दै अहिले सरकार ढाल्ने काममा लागे संविधान कार्यान्वयन नहुने तर्फ सचेत गराईन ।
उनले सरकार परिवर्तनको खेलमा लागे मुलुक अस्थिरताको चंगुलमा फेरि फस्ने उल्लेख गर्दै अहिले अस्थिरता ल्याउन खोज्नेहरु आफै संकटमा फस्ने चेतावनी दिईन । कोइरालाले भनिन,‘मुलुकमा प्रचण्ड मात्रै एक्लो नेता हुन र उनका लागि सरकार ढाल्नु पर्ने ? उनी अहिले प्रधानमन्त्री बन्न पनि सक्दैन र सफल पनि हुँदैनन ।’
कुनै पनि सरकारलाई एउटा अवधीसम्म चल्न दिएर मुलुकमा स्थिरता कायम गरेर संविधान कार्यान्वयन र आर्थिक समृद्धिको दिशामा अघि बढाउनु पर्ने धारणा राख्दै प्रधानमन्त्री केपी शर्मा ओलीको योजनाले जनतामा उत्साह ल्याएकोले काग्रेसले फेरि जनतालाई निराश बनाउने कुनै पनि निर्णय नगर्ने विश्वास उनले ब्यक्त गरिन ।
कोइरालाले पार्टीभित्र अहिलेसम्म सरकार परिवर्तनको विषयमा कुनै छलफल नभएको अवस्थामा यस्तो कुरा कसरी बाहिर आयो भनि आश्चर्य ब्यक्त गर्दै राजनीतिक दलका नेताहरुले सम्मान पाउने हो भने केवल प्रधानमन्त्री मात्रै बन्ने खेल खेल्न छाड्नु पर्ने सुझाव दिईन ।
उनले भनिन,‘अहिले संविधान कार्यान्वयनकोलागि निर्वाचन गरेर मुलुकलाई निकास दिनु पर्छ । सरकार परिवर्तनको खेलमा लाग्नु हुँदैन । एक त यो सरकार ढल्दै ढल्दैन, ढले पनि उनीहरु आफै सकिन्छन ।’
नेकपा एमालेका सचिव प्रदिप ज्ञावलीले मुलुकमा अहिले निर्वाचन हुन नदिएर संविधान र राजनीतिक दलहरुलाई असफल बनाएर गैरदलीय ब्यक्ति ल्याउने खेल भईरहेको दावी गर्दै अहिले सरकार बदल्ने खेलले मुलुकको हित नगर्ने दावी गरे ।
उनले बजेट पारित भएपछि सरकार परिवर्तन गर्ने गरीसहमति भएको हो भने प्रचण्डले बजेट पारित नहोउन्जेलसम्म धैर्यता गर्नु पर्ने भन्दै एउटा सरकारमा बसेर अर्को सरकारको कुरा गर्ने नैतिकता कसैसँग नहुने स्पष्ट पारे ।
ज्ञावलीले कांग्रेस, एमाले र मधेसबादीसहित प्रचण्डको नेतृत्वमा राष्ट्रिय सहमतिको सरकार बन्ने ग्यारेन्टी भए नेकपा एमाले सरकारको नेतृत्वकोलागि छलफल गर्न खुल्ला रहेको स्पष्ट पार्दै मुलुकको समस्या समाधान हुन्छ भने नेकपा एमाले सरकारको नेतृत्व छाडेर प्रतिपक्षमा बस्न तयार रहेको बताए ।
उनले भने,‘राष्ट्रिय सहमति बन्ने अवस्थामा एमाले एक मिनेट पनि अवरोध गर्दैन । हामी पनि राष्ट्रिय सहमतिकोलागि योगदान गर्न चाहन्छौ । संविधान जारी गर्दा एक भएका चार दल ईन्ट्याक्ट हुनु पर्छ भन्ने पक्षमा हामी छौ तर काग्रेसले नै दुई ठूला दल एकैपटक सरकारमा बस्न नहुने भनेर आफ्नो लाईन स्पष्ट पारिसकेको अवस्थामा मुलुकमा राष्ट्रिय सहमतिको सरकार बन्ने अवस्था छैन ।’
ज्ञावलीले राष्ट्रिय सहमति बन्न नसक्ने अहिलेको अवस्थामा तीन तहको निर्वाचन, संविधान कार्यान्वयनकोलागि १३९ नयाँ ऐन र ५ सय ऐन संसोधन गर्ने, मधेसी मोर्चालाई सहमतिमा ल्याएर निर्वाचन गर्ने, प्रदेश र स्थानीय तहको सीमांकन गर्ने र भुकम्प पीडितको पुर्नस्थापनाको विषयमा सहमति गरेर अघि बढ्न सकिने सम्भावना औल्याउँदै त्यस्तो अवस्थामा जुन दल सरकार बाहिर रहे पनि केही फरक नपर्ने दावी गरे ।
तत्कालिन एकीकृत नेकपा माओवादीसँग भएको नौ बुँदे सम्झौता कार्यान्वयमा गईरहेको दावी गर्दै शान्ति प्रक्रियाका विषयमा सर्वोच्चको फैसला, अन्तर्राष्ट्रि समूदाय र द्धन्द पीडितहरुको भावना विपरित प्रचण्ड प्रधानमन्त्री भए पनि काम गर्न नसक्ने ठोकुवा गरे ।
उनले भने,‘गंम्भिर अपराधका मुद्दाको सम्बन्धमा सर्वोच्च अदालतले गरेको फैसला, अन्तर्राष्ट्रिय सन्धी सम्झौता र द्धन्दपीडितको भावना विपरित गएर ईन्द्रको बाऊ चन्द्रेले पनि केही गर्न सक्दैन । त्यसैले एमाले केही गरेन भन्ने आरोप गलत हो ।’
ज्ञावलीले कांग्रेस नेतृत्वको सरकारले नै तीन किस्तामा भुकम्प पीडितलाई रकम दिने र उनीहरुको यकिन गर्ने भनि सम्झौता गरेकोले अलिहेको सरकारले चाहँदा चाहँदै पनि एक मुष्ट दुई लाख रुपैया दिन नसक्ने स्पष्ट पार्दै त्यस विषयमा दातृ निकायहरुसँग छलफल भईरहेको जानकारी दिए ।
उनले एमाओवादीसँग भएको नौ बुँदे सहमति अनुसार लडाकुहरुलाई दुई लाख रुपैयाँ दिने गरी बजेट आएको, मधेसी मोर्चासँग बार्ता गर्न सरकारले तारन्तार पत्र पठाईरहेको उल्लेख गर्दै नौ बुँदे सम्झौता कार्यान्वयनमा गईसकेको दावी गरे ।
उनले भने,‘यो सम्बन्ध सुधारको दिशामा होईन भने को हो त ? के भारतीय नाकाबन्दीको सामू झुक्दा राम्रो हुन्थ्यो त ?’ नेकपा माओवादी केन्द्रका नेता मणि थापाले शान्ति प्रक्रियालाई टुङग्याउन नेकपा एमालेले नकारात्मक भूमिका खेलेको आरोप लगाउँदै राष्ट्रिय सहमतिको सरकार गठन हुन नसके शान्ति प्रक्रियाको मुद्दामा जो पोजिटिभ हुन्छ उसैसँग नजिक भएर सरकार गठन गर्ने स्पष्ट पारे ।
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon